Tulubuzz

  ಐತಿಹಾಸಿಕ ಬೊಕ್ಕ  ಆಧ್ಯಾತ್ಮಿಕವಾದ್  ಮಹತ್ವಪಡೆಯಿನ, ಅಯೋಧ್ಯೆಡ್  ಪೊಸತಾದ್  ಕಟ್ಟಿನ  ಶ್ರೀ ರಾಮ ಮಂದಿರಡ್   ಪ್ರಧಾನಿ ನರೇಂದ್ರ ಮೋದಿ ಬಾಲೆ ಶ್ರೀ ರಾಮನ  ಮೂರ್ತಿನ್ ಲೋಕೊರ್ಮೆ ಮಲ್ತೆರ್. ಕೋಟ್ಯಂತರ ಜನಕ್ಲೆನ್ ಐನೂದು ವರ್ಷ ಪಿರಾಕ್ದ ಕನ ನಿಜ ಆಂಡ್ .   ಮದ್ಯಾಹ್ನ 12.30ದ  ಅಭಿಜಿತ್ ಶುಭ ಮೂರ್ತೊಡು ವಿಗ್ರಹದ ಪ್ರಾಣಪ್ರತಿಷ್ಠೆ ಮಲ್ತೆರ್.ಧಾರ್ಮಿಕ ಕಟ್ಟ್-ಪಾಡ್, ಮಂತ್ರ,ಸ್ತೋತ್ರೊಲೆಡ್ ಬಾಲ ರಾಮಗ್ ಆರತಿ ಬೆಳಗಾಯೆರ್.  84 ಸೆಕೆಂಡ್ದ್ ಆ ಪುಣ್ಯ ಕಾರ್ಯೋನು ತೂದ್ ಜನಕುಲು ಸಂತುಷ್ಟರಾಯೆರ್.     .          'ಪ್ರಾಣ ಪ್ರತಿಷ್ಠಾ' ಸಮಾರಂಬೊದ  ಬೊಕ್ಕ ಪ್ರಧಾನಿ ಮೋದಿ ದೇವೆರ್ನ ಪ್ರಸಾದ ದೆತೊಂದು ಪಾಸ ಬುಡಿಯೆರ್.   ಬೊಕ್ಕ ಪಾತೆರಿನ ಪ್ರಧಾನಿ ಮೋದಿ, ಕರಿನ 11 ದಿನೋಡ್ದಿಂಚಿ  ಬೇತೆ ಬೇತೆ ಭಾಷೆ ಬೊಕ್ಕ ರಾಜ್ಯೋಲೆಡ್ ರಾಮಾಯಣೊನ್  ಕೇಂಡಿನ ಅನುಭವ  ಬೊಕ್ಕ ರಾಮದೆವೆರೆನ  ಬೇತೆ ಬೇತೆ ಜಾಗಲೆಗ್  ಪೋಯಿನ ವಿಚಾರೊಲೆನ್ ಪಟ್ಟಿಯೆರ್ .  ಬೊಕ್ಕ  'ಜಟಾಯು' ಪ್ರತಿಮೆನ್  ಲೊಕೊರ್ಮೆ  ಮಲ್ತಿನ  ಮೋದಿ  ಕುಬೇರ್ ತಿಲಾಟ್ ಈಶ್ವರಗ್  ಪೂಜೆ ಮಲ್ತೆರ್. 

ದೇವಸ್ಥಾನೊಲೇ ಊರಾಯಿನ ಉಡುಪಿಡ್ ಪರ್ಯಾಯದ ಅಟ್ಟಣೆ ಜೋರಾತ್೦ಡ್. ಜನವರಿ 18ಗ್ ನಡಪುನ ಉಚ್ಚಯೋಗ್ ಊರಿಡೀ ಸಿಂಗಾರ ಆತ್೦ಡ್ . ಸಾದಿ ಬೀದಿಲು ,ಅಂಗಡಿ ,ದೇವಸ್ಥಾನ ,ಮಠೋಕುಲು ದಿಂಜಿ ಬೊಲ್ಪುಡು ಮಿಣ್ ಕೊಂದುಲ್ಲ. ಪ್ರತಿ ರಡ್ಡ್ ವರ್ಷೋಗೋರ ಬದಲಾಪಿನ ಶ್ರೀ ಕೃಷ್ಣ ಮಠತ ಆಡಳಿತೊಗ್ ಈ ಸರ್ತಿ ಪುತ್ತಿಗೆ ಮಠೋದ ಶ್ರೀ ಸುಗುಣೇಂದ್ರತೀರ್ಥ ಸ್ವಾಮೀಜಿ ಪರ್ಯಾಯ ಪೀಠಾರೋಹಣ ಮಲ್ಪರೆಗುಲ್ಲೆರ್. ಪರ್ಯಾಯ ಮಹೋತ್ಸವ ಉಡುಪಿದ ಧಾರ್ಮಿಕ ಸಂಪ್ರದಾಯೊನು ಪ್ರತಿಬಿಂಬಿಸಾವುನ ಮಾಮಲ್ಲ ವೇದಿಕೆ. ಪರ್ಯಾಯೋದ ದಿನ ಕೃಷ್ಣ ಮಠೋಟು ಮಸ್ತ್ ಪೂಜೆ ,ಯಜ್ಞ ,ಹೋಮೊಲು ನಡಪುಂಡು ,ಉಂದೆನ್ ತೂವರೆ ಊರ ಪರವೂರ ಭಕ್ತೆರ್ ಸೇರ್ವೆರ್. ಧಾರ್ಮಿಕ ಆಚರಣೆ ಅತ್ತಂದೆ ಪರ್ಯಾಯ ಮಹೋತ್ಯ್ಸವ ಉಡುಪಿದ ಶ್ರೀಮಂತ ಸಾಂಸ್ಕೃತಿನ್ ತೋಜಾದ್ ಕೊರ್ಪು೦ಡು. ವೇದಿಕೆಲೆಡ್ ಮಸ್ತ್ ಸಾಂಸ್ಕ್ರತಿಕ ಕಾರ್ಯಕ್ರಮ, ಪದ ,ನಲಿಕೆ ನಡಪುಂಡು . ಅವ್ವತ್ತಂದೆ ಮೆರವಣಿಗೆಡ್ ವಾದ್ಯ - ಬ್ಯಾಂಡ್,ಕೊಂಬು, ಚೆಂಡೆ , ನಾಸಿಕ್ ಬ್ಯಾಂಡ್ ,ಡೋಲು ಕುಣಿತೊಲು ,ಜಾನಪದ ನಲಿಕೆಲು ,ತಾಲೀಮ್ ,ತಟ್ಟೀರಾಯನ ಬಗೆ ಬಗೆತ ವೇಸೋಲು ಮನಸ್ ಇರ್ಮೆನ್ ಮಲ್ಪು೦ಡು.